Հակածխախոտային ծրագիրը Հայաստանում

Ովքեր հետևում են Հայաստանում ընթացող հակածխախոտային ծրագրի զարգացումներին, կհիշեն, որ 2004 և 2006 թ.թ. մեր երկիրը մասնակցեց միջազգային «Quit&Win» արշավին։։

Հիշեցնենք` «Quit&Win» բառակապակցությունը թարգմանվում է որպես «Թող և հաղթիր»։ Հասկանալի է, որ խոսքը ծխելուց հրաժարվելու մասին է։ Արշավի պայմանները հետևյալն են. մասնակցել ցանկացողները ստաձնում են պարտավորություն առ այն, որ չեն ծխելու ամբողջ մայիս ամսվա ընթացքում Իսկ նրանց, ում կհաջողվի  դիմակայել այդ գայթակղությանը, մայիսի 31-ին, երբ աշխարհում նշվում է «Առանց ծխախոտի Միջազգային օրը», սպասում է խաղարկություն, որի արդյունքում ընտրվում է մի անձ, ում ազգանունն ուղարկվում է Հելսինկի (Ֆինլանդիա), որտեղ գտնվում է արշավի կենտրոնական շտաբը։ Այնտեղ ամբողջ աշխարհից եկած անձանցից նույնպես խաղարկության միջոցով ընտրվում է մեկը, ով շահում է 10 հազ. ԱՄՆ դոլար։ Իհարկե, պարզ է, որ այդ գումարը շահելու հավանականությունը մեծ չէ, բայց ամեն դեպքում ծխողներին առաջարկվում է ծխելը թողնել ավելի հետաքրքիր, ոչ սովորական, արտառոց ձևով։ 2008 թ., ինչ-ինչ պայմաններից ելնելով, միջազգային «Quit&Win» արշավը տեղի չունեցավ, սակայն Հայաստանի առողջապահության նախարարությունը, Առողջապահության համաշխարհային կազմակերպությունը և «Մարդու առողջությունը» մարդասիրական հիմնադրամը, որոնք և եղել էին 2004 և 2006 թ.թ. «Quit&Win» ազգային արշավի կազմակերպիչները, որոշեցին, այնուամենայնիվ, նշել 2008 թ. մայիսի 31-ը` հիմնվելով այդ հետաքրքիր արշավի նախորդ արդյունքների տվյալների վրա։

Մենք զանգահարեցինք բոլոր նրանց, ում հաջողվեց հրաժարվել ծխելուց 2004 ու 2006 թ.թ. և չծխել մինչ օրս։ Հավաքվեց 41 մասնակից։ Նրանց գումարվեցին ծխախոտից հրաժարված լճաշենցիներ, և մայիսի 31-ին բոլորը հրավիրվեցին Հայաստանի ամերիկյան համալսարանի բիզնես կենտրոնի դահլիճ` մասնակցելու հանդիսավոր միջոցառմանը։ Ըստ մշակված ծրագրի` բոլոր հրավիրվածները և զանգվածային լրատվամիջոցների ներկայացուցիչները մասնակցեցին ՀՀ ԱՆ կողմից կազմակերպված մամուլի ասուլիսին, որից հետո «Մարդու առողջությունը» մարդասիրական հիմնադրամը և բուլղարական «Սոֆարմա» ԴԸ հայաստանյան ներկայացուցչությունը անցկացրին խաղարկություն։ Ծխախոտից հրաժարվողներից մեկը շահեց DVD-փլեյեր, իսկ բոլոր մնացյալ ներկաներին ընծայեցին վերնաշապիկներ «Tabex» հակածխախոտային դեղի անվանումով։ Շահումը, վերնաշապիկները և միջոցառումը կազմակերպելու աջակցությունը իր վրա էր վերցրել բուլղարական «Սոֆարմա» ԴԸ հայաստանյան ներկայացուցչությունը, ինչի համար շնորհակալություն ենք հայտնում ներկայացուցչության ղեկավար Միքայել Շատվորյանին։

Հարցեր, պատասխաններ, մեկնաբանություններ